|
打破痛苦指數
以突破性的主題，深入探討追女仔的心態及手法 (愛情專家: 古仔華) |
[
回主頁 ] |
上一課已提及過，男人的痛苦，基本是源自追求女性時，被對方主觀施予的。最初級的痛苦，是女方刻意遲覆機又或甚至不覆機。次級痛苦是約會時，對方遲到或爽約，而所受的痛苦。再痛一點的，是自己被女方耍了一轉，結果錢又冇、人又冇簕犧牲式痛苦。今日再繼續談其餘的痛苦指數。
後備的痛苦
痛苦原因：女人雖然應承你外出，但只肯給予你「二奶時間」。
痛苦指數：百分之四十。
一般男人以為約到個女仔出街就真係發達，但如果知道對方肯畀乜「期」你，肯定被激到暈低。一般女人通常和男人初次約會，只答允對方在「二奶時間」入面和他們會面而已，這些「二奶時間」包括平日Office
Hour入面的Lunch時間，其中最屬「二奶」的，肯定就是星期六中午的Lunch時間。其他「二奶時間」則包括平日的工餘Happy
Hour但不直落，又或者個女仔只答允你和你共飯一頓，但九點半後又話約左人，死未？換句話來說，個女仔一就是覺得應該好好食你一頓飯，但又不想付出之後陪你去玩的時間；二就是只不過當你是陪客，替她們打發真正約會之前的浮游時間而已！怎樣辦？
如果是一般Lunch時間，大可以不出現，然後告訴她們經理有事搵你，再約下次晚飯去食餐「好o野」賠罪，將「二奶時間」升格為「大婆時間」，或許有用。如果對方只畀你Happy
Hour時間，照殺，原因十分之簡單，至緊要同佢飲酒，飲到佢暈頭轉向，或許可以直落，或博她下一個約會失敗，她們頓失依靠，可能就此畀你上位都大有可能。同樣情形可能發生於「晚飯期」，之後佢可能約左人飲o野，如果計畫失敗，你也有上位的機會，如果對方覺得同你好傾，唔介意帶埋你去蘭桂坊會佢其他女朋友，記得一定要去，事關追唔到佢可以轉呔追佢班Friend，一樣咁正！
被窒的痛苦
痛苦原因：女人同你約會或食飯時踢爆你想追佢，並揶揄你沒有女朋友才會出此下策。
痛苦指數：百分之四十。
很多女人基本上是極之討厭的一種人物，就係你冇女朋友，先至欣賞佢地及追佢地，但她們不但是對男人沒有同情之心或感激之心，卻往往在約會／共飯時候踢爆男方單身的困境。其原因十分之簡單，因為她們多數有個男朋友咁巴閉，知道閣下無料到，實係串到你盡。這個情況之下，在口頭上萬萬不可以示弱，如果你點晒頭，佢一定仲笑到你暈，不給你機會之餘尚要通過你尋找口頭滿足，好人有限。故此先不要示弱，萬萬不可承認自己無女在手，一定要話「我有女友，不過我們約法三章，佢可以約會男性，我也可以約會女性！不阻我們彼此之間的相愛！」這番對話，一不示弱，二來向她暗示自己可以同佢「玩下」，如果對方想玩一腳踏兩船，很可能同你有下文。
致命的痛苦
痛苦原因：女人同你約會／共飯，或已約你回屋企煮飯仔，但突然之間晴天霹靂，佢男友好似係CID咁出現，嚇到你傻，仲同你一齊開飯。
痛苦指數：百分之九十。
情況當然大大不妙了，因為這證明了女方已將你追她的一切向男朋友詳細告解報道，今時今日男友就向你採取行動，這表示一方面個女仔同佢男友有料到，感情濃厚；另一方面佢男友十分之陰濕，不是君子所為，這時你只可以做一件事，就係同佢男友扮Friend，向他暗示自己明白收到晒一切一切，請你大哥放心放心，跟著斷絕同個女仔來往，事關再去也沒有必要，這一對男女已變成了「雌雄大盜」，所以你最好盡快走頭。
水魚的痛苦
痛苦原因：女人同你開心一排，然後叫你幫襯佢買保險買金買股票。
痛苦指數：百分之七十。
千祈唔好驚，個女仔咁經濟主義，如果閣下有些少錢，可以同佢玩過，橫掂佢都見錢開眼，咪同佢玩𣈳囉，起碼大家從此有共同話題，不過要同自己Set一個Limit（金錢上和時間上的），使完錢之前要搞掂佢，OK？
回到主頁，選擇下一課 >>>
**
以上內容只作參考，並不表示此網頁鼓勵任何不道德之行為及任何有可能/可以違反香港法律之行徑
|
